Pas emocioneve të para dy netëve në Shkodër dhe Tiranë, FMM8 – Festivali i Muzikës Moderne u rikthye më 25 korrik në një nga hapësirat më autentike të qytetit: “Oda” në Gjuhadol.
Ky mjedis i ngrohtë dhe plot histori, i vendosur në zemër të lagjes së vjetër shkodrane, u shndërrua në një skenë intime ku muzika moderne u jetua nga afër, në një atmosferë që bashkoi traditën me risinë.
Në këtë natë, muzika u përjetua si një rrëfim i drejtpërdrejtë midis artistëve dhe publikut. Galaverna, Quartetto Mantua, FMM_band dhe Big Band-i i Qytetit të Shkodrës sollën një program të pasur me improvizime, nuanca bashkëkohore dhe energji që e bënë këtë koncert një përvojë të pazakontë.
Shkodra, me “Odën” e saj të mbushur plot, dëshmoi edhe një herë se është një qytet ku arti gjen gjithmonë shtëpi dhe publik të etur për muzikë.
Nata e tretë e FMM8 i dha festivalit një dimension më intim, duke i ofruar artdashësve jo vetëm muzikë, por edhe ndjesinë e një bashkëbisedimi të drejtpërdrejtë me artistët dhe me qytetin vetë.
🤝 Festivali organizohet nga Shoqata Kulturore Artistike “Prenkë Jakova”, me mbështetjen e Ministrisë së Ekonomisë, Kulturës dhe Inovacionit (MEKI), Bashkisë Shkodër dhe Bashkisë Tiranë.
🎶 FMM8 – Muzika që bashkon.
